Yusuf Vapi aur Peer Zulfiqar Ahmad Naqshbandi controversy. Article 1

Bismillahir Rahmanir Raheem

Yusuf Vapi Naami ek shakhs hai, jisne Hamare Dada Peer Hazrat Maulana Peer Zulfiqar Ahmad Naqshbandi DB par chand ilzaam aur aitraaz kiye hain, Insha Allah un me se kuch ka Tahqeeqi aur Tanqeedi Jayeza liya jaayega aur chunke Yusuf Vapi Sahab is tarah baat karte hain Goya deobandiyat ki tarjumani aur tatheer ka inhone zimma liya hua hai isliye hamare is blog me Akabir Ulama e deoband ba-haisiyat-e-mizaan honge aur saath me Maujooda Ulama bhi jo ahnaaf deoband ke wakeelon me shumaar hote hain...

Sabse pehle dono hazraat mukhtasar ka Ta'aruf

Peer Zulfiqar Ahmad Naqshbandi Kaun hai ?

Laakhon ulama ke roohani rehnuma hain, inke baaz khalifa bhi apne aap me aise log hain jin ki misaal is zamane me mushkil hai, unme, Hazrat Maulana Sajjad Nomani Db aur Hamare Peer o Murshid Maulana Mohammad Ilyas Ghumman DB Sar e Fehrist Hain.

Darul uloom deoband Peer Zulfiqar Ahmad Naqshbandi DB ko Bahaisiyat e Akabir Tasleem karta hai.

Yusuf Vaapi Sahab Kaun Hain ?

Ye Allah Swt ki ek gaaib makhlooq hai, jiski tahqeeq aur pohonch phone tak hai, mai hazrat ki gustakhi nahi karraha magar yahi Haqeeqat hai, na arbi aati hai na fiqh ke baare me pata hai lekin ye deen ko bachane chal pade hain...

Ta'ajjub to un logo par hain jo YouTube se deen lete hai aise logo se jinko jaante tak nahi...

Ek Sawaal Shar'ee Nuqt-e-Nazar se aur Vaapi Sahab ke followers ke liye Lamha e Fikr:

1. Kya hukm hai Majhool logo se Ilm haasil karne ka shariat me ?

ما حكم سماع أشرطة المجاهيل وأخذ العلم عنهم؟

~

Sahih Muslim me ek Imam Muslim rh ek baab bandhte hain

Jiska title hi "Al Isnaadu Minad Deen" hai,

Ya'ni ke koi bhi shakhs kuch baat karraha hai to uska haal (Muamlaati aur Ilmi dono) jaanna zaroori hai warna wo majhool kehlaata hai aur majhool shakhs ki baat shariat me qubool nahi ki jaati... Ye ek zaabta hai

Imam Muslim Imam ul Muabbireen Mashoor Tabayi' Imam Muhammad Sireen Rh ka Qaul laate hai,

Tarjuma: Ye Ilm e deen, Ehtiyaat ke saath dekho ke tum deen kisse lerahe ho.

Aur Yahi baat baaz Fuqaha ne Nabi ﷺ ke saath dusre alfaaz ke saath Mansoob ki Hai.

Haasil ye hua, ke Yusuf Vapi ek be-sanad, Majhool (anonymous) shakhsiyat hain, inse ilm Lena shar'ee Aitebaar se Qat'an Jayez Nahi, lekin baaz log samjhte hai inke saath milkar wo deen bacha rahe hain, Shariyat ke khilaf jaakar kaunsi shariyat bachai jaa sakti hai ?

Ek Muhavara Mashhoor hai

Bismillah kehkar Haram khaane se haram halal nahi hojata

Aitraz Number 1

“Peer Zulfiqar Ahmad Naqshbandi Aur Unke Saahibzaade khoob kharch karte aur Aysh karte hain hain.”

Jawab:

Ham ne Kaha tha ham meezaan apne akabir Ulama ko rakhenge lihaaza pesh hain Hazrat Thanavi rh,

Tarjuma:

Hadhrat Thanvi rh Title dete hain,

“SAAMAN E AYSH AUR WILAYAT ME MANAFAT (tazaad) NAHI.”

ek hadith naqL karte hain jiska mafhoom hai,

“Bohot se Log dunya me narm bistaron par Allah ta'ala ka Zikr karenge, Allah Ta'ala unko Aala Tareen Jannati mo Jagah dekhenge.”

Phir hazrat fayeda likhte hain,

“Aksar Awaam ye samjhte hain ke buzurgi ke liye khasta haal hona zaruri hai.”

📙 At takasshuf Safa 692

Pata ye chala ke Jab Allah swt ne ata kiya hai to aysh o ishrat me koi masla nahi hai is shart ke sath ke shariat ke khilaaf na ho. Aur ye bhi pata chala ke Yusuf Vapi Sahab awaam me se hai.

Hamare Shaykh, Mutakallim e Islam Maulana Muhammad Iliyas Ghumman DB farmaate hain jiska mafhoom hai,

“Logo ne alag hi nazariya bana liya hai, ke aalim gareeb ho to nek hota hai Ameer ho to nek nahi, log kehte hai hamare paas badi gaadi hai ham kehte hai Allah hame aur dega to ham helicopter bhi lenge.”

InshaALLAH

Ab ek baat rehjaati hai ke kya peer sahab ke saahibzaade ke haath me bohot mehengi jo ghadi hai wo fizool kharch nahi?

To jawab ye hai ke shariat me Maamla relative hota hai, 

Misaal ke taur par zaid ko gareeb hai maahana 15 hazar kamaata hai, agar wo EMI pe ek 50 hazaar ka phone lele agarche wo kaam 10 hazaar ke phone me hojata ho to ye kaha jayega ke zaid ne fuzool kharchi ki aur gunehgaar hoga

Iske bar'aks Abdullah mahine ka 2 Lakh kamata ho to agar wo ek laakh rupye ka bhi phone bazaar se zarurat ke liye le aaye to fuzool kharch me shumaar na hoga Kyunke Waqayi me Allah swt ne hi usey ata kiya hai

Maze ki baat to ye hai ke yusuf Vapi Sahab door se tasveeron me pixels phate huwe dekhkar bhi ghadi ka naam aur price nikaal liya karte hain...

Aitraz Number 2

Peer Zulfiqar Ahmad Naqshbandi DB Pe Darul uloom Karachi ne fatwa diya hai

Jawab:

Is cheez ka aasaan jawab ye hai, ke ye fatwa aapne Central mosque UK ki website se uthaya hai jo 2 saal purana article hai, ab rahi baat fatwe ki to pure fatwe me ek bhi jagah Peer Zulfiqar Ahmad Naqshbandi DB ka naam nahi likha huwa hai.

Inhone daawa kiya hai ke fatwa peer Zulfiqar Sahab hi ke liye hai, aur yaha waha ulama se us fatwe ko peer Sahab se jodne ki naakaam koshish ki hai, inko ye chahiye tha ke Direct Darululoom Karachi ke darulifta se sawaal karte ke ye Fatwa kis shakhs ke liye hai.

Mazeed ye ke, ye fatwa bagair naam ke tha saalo purana magar hamare paas ek fatwa maujood hai UMMUL MADARIS DARUL ULOOM DEOBAND ka, jo ke isi saal yaani 2022 ka hi hai jisme Peer Zulfiqar Ahmad Naqshbandi DB ka sarahatan naam likha hua hai aur phir unhe Akabir kaha hai...

Allahu akbar, jumla likhdeta hu ke Maulana Mufti Abul Qasim No'mani Db jo ke Mohtamim Hai Darululoom deoband ke unhone kya likha,

Likhte hain,

"Ham is masle me apne AKABIR yaani peer Zulfiqar Ahmad naqshbandi aur Mufti Ahmad Khanpuri Db ki tarah apni Tahreer se Ruju Karte hain" 

Muhaddiseen ka usool hai, ke Jarah par Ta'deel Muqaddam hoti hai, Lihaza, Yahan Darululoom Deoband ka Naam Lekar inko Akābir kehna hi Raajeh hai...

Wallahu Aalam

Agli Qist ka Intezaar karen

Bandah,

Ibn Fakhruddin